Müsabiqənin Tapşırığı
Abşeron memarlığını qorumaq, milli incəsənət ruhunu yaşatmaq və gələcəyə ötürmək məqsədilə Bakı Şəhər Memarlıq və Şəhərsalma Baş İdarəsi müsabiqə elan edir.
Müsabiqənin əsas tapşırığı Abşeron memarlıq məktəbinin üslub xüsusiyyətlərini və özünəməxsus rəng çalarlarını yenidən canlandırmaq və gələyəcə ötürməkdir. Müsabiqə tapşırığına dair digər köməkçi materiallar hər bir iştirakçıya qeydiyyatdan keçdikdən sonra elektron poçt ünvanına göndəriləcək. Tapşırıq aşağıdakıları əhatə edir:
Ərazinin istinad və baş planlarını hazırlamaq;
Qəsəbənin öz mövcud bədii üslub və fəza-məkan xüsusiyyətlərini saxlamaqla konsepsiyanın əsas ideyasını tapmaq;
Milli xüsusiyyətlər, rəng və obyektin gələcək inkişafını nəzərə almaq;
Landşaft həlli üçün konsepsiya;
Ərazidə yerləşən tikililərin ümumi eksteryer həllərini tərtib etmək;
Qəsəbənin iqtisadi inkişafı, əhalinin həyat şərtlərinin yaxşılaşdırılması nəzərə alınmalıdır.
Kiçik memarlıq formaları, dekorativ aksesuarlar, sənət nümunələri, floristika və s. üzrə seçimlər etmək.
Mövcud binaların əsas fasadlarını və planlaşdırma həllərini qorumaq;
A4 formatında qəsəbə (mövcud vəziyyət, tarix, mühit, iqlim, həyat tərzi, yerli mədəniyyət və s.) və layihə (ideya axtarışı, konsept həlli və s.) haqqında izahat yazısı (2-4 səh.); 3 dəqiqəlik təqdimat videosu
Müsabiqə haqqında
Azərbaycanın qədim yaşayış məskənlərindən biri olan Abşeron yarımadası, yaşayışın mövcud olduğu zamandan misilsiz mədəniyyət nümunələri ilə daim zəngin olmuşdur. Şərqlə Qərb arasında bir körpü olan bu məkanda müxtəlif mədəniyyət və sivilizasiyaların izləri hələ də yaşayır.
Müsabiqənin əsas məqsədi Abşeronun Buzovna qəsəbəsinin küçə və məhəllələrinin ən yaxşı memarlıq həllinin müəyyənləşdirilməsidir. Nəzərdə tutulan konsepsiya gələcək abadlıq işlərində, tikinti layihələrinin hazırlanmasında təklif ediləcək. Müsabiqəyə təqdim olunan layihələrdə qəsəbə mühitinin estetik görünüşünün və həyat keyfiyyətinin inkişaf etdirilməsi, orijinallıq, mühit-məkan həllinin müəyyənləşdirilməsi əsas prinsiplərdən olmalıdır. Təqdim olunan layihələr Buzovnanın yerli memarlıq və iqlim xüsusiyyətlərinin nəzərə alınması və eyni zamanda tarixi irsin qorunması şərtilə yerinə yetirilməlidir. XIX əsrin ortalarında əhalisinin sayına görə yarımadada ikinci böyük yaşayış məntəqəsi olan Buzovna Abşeronun şimal-şərqində yerləşir. Abşeronun qədim tarixə malik yaşayış məskənlərindən biri olan bu qəsəbə eyni zamanda da çimərlik turizmi ilə də məşhurdur. Əhalisinin ənənəvi məşğuliyyəti əkinçilik, o cümlədən tərəvəzçilik, bostançılıq, zəfərançılıq, həmçinin maldarlıq, qismən də balıqçılıq ilə bağlı idi. Buzovna memarlıq abidələri ilə də zəngindir. Bunlardan bürc-qalanı (XV-XVI əsrlər), «Qara paltar piri»ni (1306-cı il), «Xəlifə Əli və Mühəmməd Mömin türbəsi»-ni (1641-ci il), Seyid Qasım, Şeyx Cavad, Seyid Gülşan pirləri, Cümə məscidi (XIX), Sahibəz-Zaman məscidi (XVII əsr), Məşədi Qərib məscidini (XIX əsr), İmam Həsən (ə) məscidini (XIX əsr), məşhur Həzrət Əli (ə) qədəmgahını (Əli Ayağı), Mehdiqulu bəyin evini (XIX əsr), el hamamlarını (XIX əsr) və qədim qəbrləri qeyd etmək olar.
Ərazilər
Azərbaycanın qədim yaşayış məskənlərindən biri olan Bakı və Abşeron yarımadası, yaşayışın mövcud olduğu zamandan misilsiz mədəniyyət nümunələri ilə daim zəngin olmuşdur
